Siglir tar il cuntegn

Header

Il convoi da la Crusch Cotschna sa prepara per entrar a Madaja en Siria.
Legenda: Il convoi da la Crusch Cotschna sa prepara per entrar a Madaja en Siria. Keystone
cuntegn

Exteriur Convoi d'agid arrivà a Madaja en Siria

Davant la citad siriana Madaja è arrivà in convoi cun rauba d'agid. Quai ha communitgà in pledader dal Comité internaziunal da la Crusch Cotschna IKRK. Il convoi da var 40 camiuns transportescha 330 tonnas mangiativas e medicaments en la citad occupada.

Ma ils camiuns ston anc passar almain 20 posts da controlla da las truppas dal reschim. La citad Madaja è occupada dapi in mez onn da truppas dal reschim e da rebels. Radund 40'000 persunas spetgan sin agid. Dapi il december èn mortas da la fom almain 23 persunas.

Fomentar civilists è in crim da guerra

Il fomentar civilists intenziunadamain vala tenor dretg internaziunal sco crim da guerra. Tenor il cudesch penal dal dretg internaziunal vegn in tal agir sancziunà cun almain trais onns praschun.

Gia il zercladur 2015 aveva il Cussegl per ils dretgs umans da l’ONU fatg attent, che tuttas partidas da conflict en la Siria dovrian il fomentar sco med da cumbat. Pervi da bloccadas sajan millis umans periclitads da murir da la fom u d’ina mancanza da provediment medicinal.

Nagin nov fenomen

Il fomentar da la populaziun a moda intenziunada è gia daditg ina strategia da guerra. En la guerra da la Bosnia (1992-1995) avevan truppas serbas bloccà la citad Sarajevo per bunamain quatter onns. En consequenza eran millis persunas mortas.

Durant la Segunda Guerra mundiala aveva l’armada tudestga bloccà Leningrad per 900 dis tranter 1941 e 1944. Quest act vala sco in dals crims ils pli grevs durant la Segunda Guerra mundiala. Sin cumond d’Adolf Hitler dueva la citad vegnir eliminada tras fomentar la populaziun. Passa in milliun umans eran morts durant quai temp.

RR novitads 15:00

Artitgels legids il pli savens

Scrollar a sanestra Scrollar a dretga