Siglir tar il cuntegn
cuntegn

Exteriur Corbyn perda fidanza da sia fracziun

La fracziun parlamentara da la partida d'opposiziun britannica 'Labour' ha renvià a ses president Jeremy Corbyn la fidanza. Quai cun 172 cunter 40 vuschs.

corbyn cun gestica
Legenda: Il schef da l'opposiziun britannica, Labour, Jeremy Corbyn tar in pled per restar en l'UE anc avant la votaziun. Keystone

Critichers renfatschan al president da la 'Labour' Jeremy Corbyn da betg esser s'engaschà avunda per che la Gronda Britannia restia en l'Uniun europeica. Latiers n'haja la partida cun Corbyn nagina schanza d'elecziuns novas.

Corbyn sez n'ha mussà naginas mustgas da demissiunar. En ina decleranza punctuescha Corbyn ch'el saja vegnì elegì president da lezzas uras cun 60% da las vuschs dals commembers da la Labour. El na veglia betg tradir questa elecziun democratica cun ina demissiun. El ha annunzià da vulair candidar danovamain, sche ses adversaris entaifer la partida veglian sfurzar ina nova consultaziun dals commembers.

Malsegirtad era tar ils 'Tories'

Era tar ils 'Tories' conservativs n'è la strategia per il futur betg clera suenter il gea al Brexit, da s'extrar da l'Uniun europeica. Gronda discussiun là è la successiun al primminister David Cameron. Lez aveva annunzià sia demissiun fin l'october da quest onn. Il minister da finanzas britannic George Osborne, che valeva sco successur da Cameron, ha refusà da succeder a Cameron. El haja cumbattì ferm per restar aifer l'UE, scriva Osborne en la gasetta americana «Times».

RR novitads 20:00