Corea dal Nord duai turnar a la maisa da discussiun cun Trump

Il president da la Corea dal Sid Moon Jae-in e Donald Trump han en mira ina soluziun paschaivla davart la dispita atomara en la Corea dal Nord. Quai ha il president sidcorean ditg durant ina conferenza da pressa a Seoul.

Il president da la Corea dal Sid Moon Jae-In e Donald Trump durant ina conferenza da pressa. Bild in Lightbox öffnen.

Legenda da maletgs: Il president da la Corea dal Sid Moon Jae-In e Donald Trump han en mira ina soluziun paschaivla cun la Corea dal Nord. Keystone

L'emprim ha Trump visità ina basa militara americana en il sid da la chapitala Seoul. La è Trump vegnì beneventà dal president sidcorean Moon Jae-in. Tar quest inscunter duai il program d'atom da la Corea dal Nord star en il center dals discurs.

Trump e Corea das Sid rinforzan squitsch sin Corea dal Nord

Ils Stadis Unids e ses allià, La Corea dal Sid, han en mira ina soluziun paschaivla davart la dispita pervia dal program atomar da la Corea dal Nord. Tenor il president sidcorean Moon Jae-in sajan el ed il president american dentant da l'avis ch'ins stoppia augmentar il squitsch sin Pjöngjang, fin che la regenza desistia da ses program atomar. La Corea dal Nord duai turnar a la maisa da discussiun. Ils Stadis Unids e lur alliads possian porscher a la Corea dal Nord in meglier futur.

Il president fa per il mument in viadi da duas emnas en l'Asia. Il conflict cun la Corea dal Nord vegn era a dominar ils ulteriurs discurs da Trump sin ses viadi tras l'Asia. Ulteriuras staziuns èn China, Vietnam e las Filippinas. En vista a la situaziun tranter l'USA e la Corea dal Nord è la visita ina situaziun difficila sin il viadi da duas emnas en l'Asia.

Visità il Giapun ordavant

Sco emprima destinaziun da ses viadi tras l'Asia ha Trump visità il Giapun. Tar in discurs cun il primminister giapunais Shinzo Abe aveva Trump puspè smanatschà al reschim nordcorean. Trump ha ditg che la èra da la pazienza strategica saja a fin. En vista a la smanatscha nucleara da la Corea dal Nord spera la regenza a Seoul sin ina pli ferma allianza cun Washington.

La mesemna tegna Trump in pled avant il parlament sidcorean. Alura va el vinavant en direcziun da Peking.

RR novitads 06:00+