Siglir tar il cuntegn

Header

cuntegn

Exteriur Corea dal Nord fa test cun racheta intercontinentala

Suenter il test d'ina bumba atomara il schaner è la Corea dal Nord danovamain en il focus internaziunal: tenor atgnas indicaziuns ha il pajais sajettà la dumengia cun success in satellit en l'orbit. Entant han ils Stadis Unids, la Russia, la Corea dal Sid ed il Giapun condemnà quest'acziun.

La Corea dal Sid ed ils Stadis Unids han sentenzià la lantschada da la racheta cun il satellit. Per els è quai stà in test da rachetas intercontinentalas ch'e saja vegnì zuppentà sco start d'in satellit.

Critica e smanatscha

Er la Frantscha ha reagì sin la lantschada e pretenda consequenzas. Quest test violeschia resoluziuns dal Cussegl da segirezza da l’ONU e saja in mais suenter l'ultim test atomar ina provocaziun senza senn. Quai ha ditg la regenza a Paris.

La dumengia saira è il Cussegl da segirezza da l'ONU s'inscuntrà ad ina sesida extraordinaria, ed el ha condemnà fermamain la Corea dal Nord. L'intenziun saja da decider sancziuns pli severas cunter il reschim nord-corean, hai num en ina decleranza ch'era la China ha sustegnì.

Tema da smanatscha atomara

Suenter il test da racheta da la Corea dal Nord ha la Corea dal Sid annunzià da vulair far discurs uffizials cun ils Stadis Unids da l'America davart la furniziun da rachetas da chatscha. Ils dus pajais sajan sa cunvegnids da discutar davart posiziunar talas rachetas da chatscha, ha communitgà il minister da defensiun sidcorean.

La tema dals dus pajais è numnadamein, che la Corea da Nord pudessia equipar ina tala racheta cun in detunatur atomar. Uschia fiss la Corea dal Nord capabla da smanatschar a la Corea dal Sid, dal Giapun ed er a la costa dal vest dals Stadis Unids.

RR novitads 06:00

Artitgels legids il pli savens