Siglir tar il cuntegn

Header

Navigaziun

Purtret da Kim Jong Un.
Legenda: La Corea dal Nord ha fatg tests cun ina nov'arma. Keystone
cuntegn

Exteriur Corea dal Nord ha testà nov'arma

Tar la nov'arma sa tractia d'ina arma dirigibla, tactica. Quella possia transportar in detunatur enorm, han rapportà medias statalas. Indicaziuns pli exactas na datti betg. Il dictatur nordcorean, Kim Jong Un ha sulettamain ditg che l'arma saja da fitg grond'impurtanza.

Ina funtauna independenta che avess pudì confermar il test na datti anc betg. Igl è l'emprim test da rachetas dal pajais dapi november. Là era gia vegnì discurrì dal svilup d'ina arma da high-tech.

Corea dal Sid di ch'i n'haia dà nagin start

In represchentant dal militar sidcorean ha ditg ch'i haja dà nagin start da racheta en la Corea dal Nord. Il sistem da radar da la Corea dal Sid avess uschigliò registrà quai. En in'emprima reacziun han ils Stadis unids laschà savair ch'ins haja prendì enconuschientscha.

La Corea dal Nord vegn survegliada spezialmain da la cuminanza internaziunala, quai pervi dals blers tests da rachetas ed armas nuclearas dals ultims onns. Avant in onn aveva la regenza communista declerà ch'i chalian da far tests cun armas nuclearas. Dapi lura è la sitauaziun en la regiun sa calmada. Er la relaziun cun ils Stadis Undis è vegnida meglra.

RR novitads 06:00