Seoul e Pyeongchang l'inscunter l'emna proxima en il lieu da cunfin Panmunjom per discurrer davart dumondas logisticas en connex cun l'inscunter suprem dals dus pajais ch'è planisà per la fin avrigl. Ils pajais vegnian ad esser represchentads tras mintgamai trais delegads, declera il ministeri da defensiun sidcorean.
Ils delegads duain fixar in plan da temp exact e discurrer davart pussaivels inscunters tranter ils dus presidents. Dapi l'entschatta da l'onn èn la Corea dal Sid e la Corea dal Nord puspè s'avischinadas. Quai er grazia als gieus olimpics a Pyeongchang.
Metter fin a smanatscha nucleara
La finamira da l'inscunter suprem è tenor il president sidcorean da meglierar las relaziuns bilateralas tranter ils dus pajais e da discurrer davart la restricziun dal program atomar da la Corea dal Nord. Ins stoppia metter fin a la smanatscha nucleara sin la peninsla.
Era planisà è in inscunter dal president american Donald Trump cun il manader nordcorean Kim Jong Un. Quel duai il pli tard avair lieu la fin da matg.
RR novitads 07:00