La Corea dal Nord condemna las novas sancziuns dal cussegl da segirtad da l'ONU e smanatscha als Stadis unids cun vendetga. Il reschim saja pront «da far dar pled e fatg ils Stadis unids per ses crims cunter noss pajais e noss pievel cun mesiras pli rigurusas», ha Pjöngjang communitgà sur medias statalas. La direcziun dal pajais ha plinavant accentuà da betg vulair contractar davart ses program atomar.
La Corea dal Nord aveva testà la fin fanadur – malgrà tut ils scumonds dal cussegl da segirtad da l'ONU – ina racheta intercontinentala che pudess teoreticamain cuntanscher la terra franca dals Stadis unids. Sinaquai ha il cussegl da segirtad decretà sancziuns.
Svizra reagescha cun sancziuns
La Svizra augmenta sias sancziuns cunter la Corea dal Nord. Ella suonda la resoluziun ch'il Cussegl da segirezza da l'ONU a decidì la sonda, quai en vista al program da rachetas ed al program nuclear dal pajais asiatic.
Nov persunas e quatter interpresas èn da nov pertutgadas da las sancziuns, quai tenor il Secretariat da stadi per l'economia Seco. Duas persunas èn vegnidas stritgadas da la glista dals pertutgads.
Las persunas aschuntadas a la glista han colliaziuns cun bancas associadas a l'armada da la Corea dal Nord.
RR novitads 14:00+