Ils Stadis Unids e la Corea dal Sid han cumenzà cun lur manevers cuminaivels annuals, rapporta l’agentura da novitads Reuters che sa referescha ad indicaziuns da las autoritads.
Il manever è il pli grond dapi tschintg onns. Pervi da la pandemia da corona eran ils exercizis sfurzadamain vegnids reducids u schizunt stritgads.
Sur dal dumber da schuldads e l'equipament militar involvà en il manever n'han l'autoritads fatg naginas indicaziuns. Ils Stadis Unids da l'America han staziunà 28'500 schuldads en la Corea dal Sid.
Las tensiuns sin la penisla coreana perduran vinavant suenter che la Corea dal Nord ha gia fatg plirs tests da rachetas quest onn. Seoul tema ina reacziun da la Corea dal Nord. Quella renfatscha adina puspè ch'ils exercizis cun ils Stadis Unids sajan ina preparaziun per in'attatga militara. Washington e Seoul cuntradin a quai ed affirmeschan ch'ils exercizis servan per meglierar la capacitad defensiva da la Corea dal Sid.
Ils exercizis che cumbinan simulaziuns digitalas, exercizis pratics e civils duain durar fin il prim da settember.
Or da l'archiv
100 secundas per chapir la dispita tranter l'USA e la Corea dal Nord.