Siglir tar il cuntegn

Header

video
Scenas caoticas suenter panica da massa
Or da News-Clip dals 29.10.2022.
laschar ir. Durada: 35 Secundas.
cuntegn

Corea dal Sid Passa 150 persunas moran a Seoul tar festas da Halloween

Da festas da Halloween a Seuol, la chapitala da la Corea dal Sid, èn passa 150 persunas mortas tar ina panica da massa en ina via laterala stretga. Radund 80 ulteriuras sajan vegnidas blessadas, per part grevamain. Quai rapporta l'agentura da novitads sidcoreana Yonhap.

En in quartier da sortida sajan fullas da glieud idas en ina via laterala stretga. Las giassas enturn il lieu da la disgrazia eran tenor rapports da perditgas usché fullanadas che las equipas da salvament han gì problems da vegnir al lieu.

Il president sidcorean Yoon Suk Yeol ha ordinà dad intercurir la tragedia da radent. Plinavant ha el ordinà ina malencurada naziunala.

Reacziuns internaziunalas

La disgrazia ha schoccà la cuminanza internaziunala. Uschia han tranter auter il chancelier tudestg Olaf Scholz, il president dals Stadis Unids Joe Biden sco er il president franzos Emmanuel Macron ed il primminister canadais Justin Trudeau condolà a las famiglias da las unfrendas e sincerà lur solidaritad cun la Corea dal Sid.

Naginas unfrendas svizras

Suenter la panica da massa en la chapitala sidcoreana n’ha il departament da l’exteriur EDA naginas infurmaziuns davart eventualas unfrendas svizras. La represchentanza svizra saja adina en contact cun las autoritads cumpetentas, uschia l’EDA. Il minister da l’exteriur Ignazio Cassis ha reagì en in tweet sin las «novitads terriblas da Seoul».

RTR novitads 22:00++

Artitgels legids il pli savens