Siglir tar il cuntegn

Exteriur Corea: Surpassament dal cunfin e «cumenzament d'ina nova èra»

Kim Jong Un è l'emprim schef da stadi nordcorean che fa suenter la Guerra da la Corea il zap sur il cunfin sidcorean.

Legende: Audio Corea dal Sid e dal Nord vulan far la pasch abspielen.
0:32 min, Novitads dals 27.04.2018.

Avant 65 onns è la Guerra da la Corea ida a fin. Dapi lura ha dentant anc nagin pussant da la Corea dal Nord fatg il zap sur il cunfin e visità l'autra part coreana: Kim Jong Un è uss l'emprim. A la lingia da demarcaziun è el vegnì retschavì dal president sidcorean Moon Jae In per in inscunter suprem.

Moon ha retschavì el cun in tarpun cotschen. Ils dus schefs da stadi han ris e dà il maun a l'in l'auter. Maun en maun han els lura passà il cunfin vers il nord. Là han els fatg in per pass ed èn turnads vers il sid.

Cumenzament d'ina nova èra

«Uss cumenza ina nova èra», ha Kim scrit en il cudesch da giasts. «Ina èra da la pasch.»

Nus pudain cuntanscher cunvegnientschas impurtantas, però impurtant è che nus ans tegnain vid las cunvegnientschas. Sche betg vegnin nus a dischillusiunar noss pievel.
Autur: Kim Jong UnSchef da la Corea dal Nord

Moon ha communitgà ch'el speria ch'ins possia gia vegnir perina il venderdi, per ademplir la speranza dal pievel sin pasch. El beneventeschia la decisiun «curaschusa» da Kim da vegnir en la Corea dal sid per in inscunter suprem.

Dearmaziun e meglieraziun da la relaziun

Da lur emprim inscunter han il dictatur nordorean Kim Jong Un ed il president sidcorean Moon Jae In discutà davart la dearmaziun nucleara sin la pensinsla coreana e davart la meglieraziun da las relaziuns tranter ils dus pajais.
Tenor in pledader da Moon lavurian tuttas duas varts vi d'ina decleranza cuminaivla che duai vegnir publitgada a la fin da l'inscunter. Ins emprovia da sminuir las differenzas.

RR novitads 06:00