John Emanuel Gartmann viva gia dapi blers onns a New York City. Pli exact a Chelsea, en il sidvest da Manhattan. Uschè ruassaivel sco actualmain ha l'um, ch'è oriund da Castrisch, dentant mo vis paucas giadas la citad. Pervia dal coronavirus resta la glieud a chasa. Lieus prominents sco il «Times Square» èn quasi vids. Il coronavirus ha tutgà la metropola cun gronda vehemenza.
Quitads per il futur
Da New York vesan ins en las novitads actualmain savens ospitals ch'èn surdumandads cun la situaziun ed in sistem da sanadad surchargià. John Emanuel Gartmann na sa betg propi valitar la situaziun. El è per gronda part a chasa e banduna quella be sch'el stoppia, per exempel per far cumissiuns.
Gronds quitads fa l'um, che lavura sco producent da musica electronica, per il futur. Spezialmain las consequenzas economicas sajan grevas da prevesair. Cler è che bleras persunas perdan lur plazza pervia da questa crisa. L'um da 69 onns cumpareglia la situaziun perfin in zic cun las attatgas da terror il 2001 a New York. La differenza saja dentant che tut saja stà enconuschent davart ils attentats suenter 6-8 uras. Quai che pertutgia il coronavirus, na saja fitg bler anc betg enconuschent. Nagin na possia dir, sco i giaja vinavant, raquinta John Emanuel Gartmann.