La Spagna è stada pertutgada extraordinari ferm da la pandemia. Il dumber da mortoris tras corona è creschì gia ils emprims mais dal 2020 marcantamain. Dapi ils 9 da matg na vala betg pli il stadi d’urgenza per la Spagna ed igl ha gia dà pliras schluccadas.
![Urs Koch In um.](https://www.rtr.ch/static/cms/images/960w/672c10.jpg)
Autra è la situaziun en Galicia, nua che l’Engiadinais Urs Koch viva cun sia famiglia en la regiun da Cambados. Là èn ils cas da corona creschids avant duas emnas sin 597 cas – quai tar ina populaziun da radund 7’000 persunas. La consequenza è che tut è puspè vegnì serrà.
La tema e la ravgia envers ils politichers è fitg gronda en Spagna.
A Texas guardia or fitg bain. Quai di Anita Turner ch'abita en la chapitala dad Austin. Ins possia perfin dir, che la normalitad saja enavos. Pli u main tut saja puspè avert e l'obligaziun da mascrinas er davent. Quai ha da far cun il fatg che radund 50% da la populaziun texana è gia vaccinada. Il stadi cun 30 milliuns abitants en il sid da l'USA ha dumbrà en media durant ils ultims 7 dis var 2'000 novs cas da corona.
La gronda part da la glieud a Texas sa cumporta sco sche tut fiss passà.
![Anita Turner Purtret Anita Turner](https://www.rtr.ch/static/cms/images/960w/5ee365.jpg)
Betg da cumparegliar è la situaziun en il stadi da Michigan en il midvest dals Stadis Unids. Els sajan gist a la fin dad ina unda, di Claudius Vincenz ch'abita ad Ann Arbor. La situaziun saja uss dentant bler meglra ch'anc avant 3 emnas. Lura avevan els fin 10'000 novs cas mintga di. Actualmain èn quai anc bun 2'000 cas per di en il stadi cun radund 10 milliuns abitants.
![Claudius Vincenz Purtret Claudius Vincenz](https://www.rtr.ch/static/cms/images/960w/3dcc8e2.jpg)
Sco l'um oriund dad Andiast di, turnia la normalitad uss dentant er enavos en il stadi da Michigan. Tut las persunas ch'hajan survegnì il vaccin n'èn er betg pli obligadas da purtar la mascrina. En general fa Claudius Vincenz in cumpliment a la politica americana quai che pertutga la vaccinaziun. Tut haja funcziunà fitg bain e speditiv las ultimas emnas.
Ed en il sid dal continent american?
Divers pajais da l’America latina èn il mument sin la glista da ristga da l’Uffizi federal da sanadad. Uschia ston tranter auter quels che vegnan da la Brasilia, dal Chile u da Costa Rica ir per 10 dis en quarantina en Svizra.
Autra è la situaziun en la Venezuela. Là datti tenor datas uffizialas en congual cun la Svizra il mument quatter giadas pli paucs cas da corona. E la media da mortoris dals ultims set dis en la Venezuela è tuttina bassa sco en Svizra, numnadamain radund 0,5 morts sin in milliun abitants.
![Claudio Candrian Purtret Claudio Candrian](https://www.rtr.ch/static/cms/images/960w/d3cc51.jpg)
In che viva gia 13 onns en la Venezuela è Claudio Candrian ch’è oriund da Castrisch. Sin l’Isla Margarita nua ch’el vivia, saja la situaziun il mument quieta. El n’haja betg l’impressiun ch’i dettia daplirs mortoris ch'uschiglio.
Sin ils trais santeris vischins nua ch’el viva, n’haja el betg observà ch’i dess dapli sepulturas ch'avant la pandemia. Sin l’Isla Margarita na saja però anc betg pussaivel da far la vaccinaziun.