Angela Merkel sto ir a chasa en quarantina, quai ha dà enconuschent il pledader da la regenza tudestga. Suenter ina conferenza da pressa saja la chanceliera tudestga vegnida infurmada ch'ella ha gì il venderdi contact cun in medi ch'è entant testà positiv sin il coronavirus.
Reglas anc pli severas
La Germania fa reglas anc pli severas per cumbatter ch'il coronavirus sa derasia. Davent dad immediat èn scumandads inscunters giuador cun dapli che duas persunas cun excepziun da famiglias. Er serrar ston tuttas ustarias e saluns da frisunzs. A quai èn sa cunvegnids la chanceliera Angela Merkel ed ils primministers dals pajais federativs. En il spazi public dastg'ins sulet sa tegnair si persul u cun ina persuna supplementara che na tutga betg en il medem tegnairchasa. La decisiun vala per almain duas emnas.
RTR novitads 21:00