En L’Italia ha il dumber da las persunas infectadas surpassà la marca da 10’000. Tenor indicaziuns da las autoritads eran il mardi saira 10’149 persunas positivas. Quai è in augment da 10 pertschient aifer in di. Unfrendas dal virus dumbra l’Italia actualmain 631.
Suenter l'Austria ha er il pajais vischin la Slovenia serrà temporarmain ils cunfins cun l'Italia. La bloccada pertutga en emprima lingia il traffic da persunas, ils transports da rauba duain tenor il primminister Marjan Sarec vinavant esser pussaivels.
Uss era la Tirchia
Entant ha la regenza tirca annunzià l'emprim cas en il pajais. I sa tractia d'in um che saja entant vegnì isolà, quai ha annunzià il ministeri da sanadad tirc. La famiglia saja sut observaziun.
En ils Stadis Unids vegnan enconuschents adina dapli cas da corona. L'Uffizi da sanadad american ha annunzià che 25 persunas sajan mortas pervi dal coronavirus. La regenza da la citad New York ha declerà in lieu da l'aglomeraziun sco zona da segirezza. Là duai la garda naziunala sustegnair las forzas civilas.
Pli quiet en la China
En China restan las cifras d'infecziuns novas sin in livel bass. La mesemna en damaun han las autoritads annunzià 24 cas novs, quai èn 5 dapli ch’il di avant. Ina part dals cas novs derivian dentant da persunas che sajan turnadas da l’exteriur, en emprima lingia da l’Italia e dals Stadis Unids.
