10 onns èn passads dapi ch'è il Cosovo ha declerà sia independenza.
La decleranza d'independenza è stada il pli bel mument per tut noss pievel cosovar.
Per il schef da la regenza Ramush Haradinaj èsi cun l'independenza gartegià d'ademplir al pievel il giavisch da viver en libertad. El ha dentant accentuà che la construcziun d'in stadi modern na saja anc betg a fin.
Pli che 110 pajais renconuschan il Cosovo
La guerra dal Cosovo era ida a fin il 1999 cun passa 13'000 blessads. Suenter era il Cosovo sut administraziun internaziunala. Ils 17 da favrer 2008 ha l'anteriura provinza serba lura declerà sia independenza.
Dapli che 110 pajais han fin uss renconuschì questa independenza. Er la Svizra ha sco in dals emprims pajais renconuschì il Cosovo sco stadi independent.
Provinza malfidaivla
Auter vesa quai la regenza en Belgrad: Per ils Serbs è il Cosovo anc adina ina provinza malfidaivla.
Il 2011 aveva l'Uniun europeica instradà negoziaziuns per normalisar la relaziun tranter la Serbia e «sia provinza malfidaivla». En ils davos dus onns han ins dentant cuntanschì nagut. Il minister da l'exteriur ha ditg la sonda che la Serbia saja «anc lunsch davent» da renconuscher il Cosovo sco stadi independent.
RR novitads 15:00