En il Cosovo è il president Hashim Thaci sa retratg, suenter che l'accusa pervi da crims da guerra encunter el è vegnida confermada. Per immediat dettia el giu ses uffizi, ha ditg Thaci gievgia en la chapitala Pristina. Ses infurmants hajan declerà ad el ch'il derschader dal tribunal per delinquents da guerra a Den Haag haja confermà l'accusa. Thaci è stà durant la guerra d'independenza il 1998/99 cumandant superiur da la UCK cosovo-albana. A quella vegn renfatschà crims da guerra.
Ils derschaders na lubeschan betg ad el da cumparair sco president davant dretgira. Per proteger l'integritad da ses stadi, sa retiria el. Il president dal parlament vegnia a surpigliar la funcziun da schef da stadi, enfin ch'in nov president saja elegì.
Entant saja Thaci vegnì arrestà e transportà a Den Haag, quai rapporta il Tribunal spezial per il Cosovo.
L'accusa: 100 murdraretschs da civilists
Gia il zercladur è l'accusa vegnida inoltrada. En quella vegn renfatschà a Thaci ed ad auters crims da guerra e crims encunter l'umanitad. Tranter auter prest 100 murdraretschs da civilistas e civilists. Il fanadur era Thaci s'inscuntrà cun ils accusaders a Den Haag, per pudair discurrer davart ils puncts en l'accusa. El refusa las renfatschas envers el.
