Siglir tar il cuntegn

Header

Navigaziun

Portrait.
Legenda: «Igl è uss da far insatge» – dapi cnapp in onn inspirescha Greta Thunberg da cumbatter cunter la crisa da clima. Keystone
cuntegn

Crisa da clima Greta dà tut – in onn plainamain per il clima

L’activista svedaisa Greta Thunberg (16) vul sa deditgar plainamain a ses engaschi cunter la crisa da clima. Quai rapportan las agenturas da novitads sco l'Agentura svizra SDA.

L'activista svedaisa Greta Thunberg (16) vul finir la novavla classa e sa deditgar suenter durant in onn al cumbat cunter la crisa da clima. Quai scrivan las medias internaziunalas sa referind a la gasetta svedaisa «Dagens Nyheter», ch'ha publitgà sco emprima medium ils plans da la giuvna svedaisa.

La decisiun na saja betg stada simpla per ella, di Thunberg, dentant fetschia da basegn ch'i capitia uss insatge:

Dal 2020 vegnin nus a stuair avair drizzà la curva da las emissiuns decisamain vers aval, sche nus vulain avair ina schanza da restar sut 1,5 u 2 grads da stgaudament dal clima.
Autur: Greta Thunbergactivista da clima svedaisa

Il settember veglia ella sa participar a l’inscunter suprem davart il clima da las Naziuns Unidas ONU c New York. Ed il december lura a la conferenza mundiala dal clima a Santiago de Chile.

Per ses temp da scola na sa fetschia ella nagins quitads, dì Greta Thunberg. Ella giaja simplamain in onn pli tard sin il gimnasi.

Cun quai che Greta Thunberg refusa da sgular per betg far donn al clima tschertgia sia famiglia uss variantas co ir en America. I vegnia sclerì, sch'ella fa il viadi cun la bartga sur l'Atlantic.

RR novitads 15:00+