Schluccar las mesiras n'è er anc nagina in'opziun per l'Italia. Il primminister Giuseppe Conte è però plain fidanza che la situaziun sa megliureschia vinavant.
Las curvas per l'Italia sa megliureschian ed il dumber dals guarids creschia ferm. Quai ha ditg Conte envers medias tudestgas.
El saja perquai da buna speranza che quest trend cuntinueschia e ch'il pajais vegnia da surmuntar la fasa critica dal stadi d'urgenza.
Appel da la scheffa da la EZB
La scheffa da la Banca centrala europeica, Christine Lagarde, pretenda entant dapli solidaritad dals stadis da l'Uniun europeica.
Las regenzas stoppian porscher sustegn vicendaivel per ch'ellas possian mussar ensemen la reacziun politica optimala encunter in schoc general per il qual nagin na saja responsabel, uschia Lagarde.
Ils ministers da finanzas da l'EU avevan interrut ier lur contractivas. Quellas duain cuntinuar oz. La finamira è da chattar ina soluziun communabla per minimar las consequenzas da la pandemia.
