Il president belaruss Alexander Lukaschenko instrumentaliseschia ils fugitivs per destabilisar ils pajais vischins ed ils cunfins da l'Uniun europeica (UE). Quai condemnescha il cussegl da segirtad da l'ONU en ina decleraziun. Il vice-ambassadur russ tar l'ONU ha dentant defendì Alexander Lukaschenko: I na dettia nagina raschaun ch'il Belarus duess stgatschar fugitivs ch'èn vegnids legalmain en il pajais.
La situaziun al cunfin dal Belarus e la Pologna vegnia adina pli difficila: Plirs millis fugitivs che lessan dumandar per asil en l'UE èn bloccads al cunfin. Là vivan els sut cundiziuns precaras e spetgan sin agid. I vegn renfatschà a Lukaschenko ch'el veglia uschia prender vendetga pervia las sancziuns che l'UE aveva decidì, perquai ch'il Belarus supprimia la societad e l'opposiziun.