La processiun tradiziunala che cumenza a Jerusalem e finescha a Betlehem è vegnida manada dal chau da la baselgia catolica en la Terra sontga Pierbattista Pizzaballa. Suenter ha lieu a Betlehem - che vala sco lieu da naschientscha da Jesus - ina messa per festivar la vigilgia da Nadal. En ses messadi da Nadal ha Pizzaballa discurrì d'ina situaziun difficila per la regiun d'Israel e la Cisjordania. Quai pervia dals problems politics, la violenza e la tensiun che regia adina puspè en la regiun.
Gronda fulla da glieud
Il ministeri da turissem da l’Israel quinta durant ils dis da Nadal cun radund 150’000 turists cristians. Malgrà ch'i ha adina puspè dà tensiuns, saja l'onn 2018 stà in onn da record per il turissem en l'Israel e la Palestina. Enfin la fin da l'onn quinta l'Israel cun passa 4 milliuns turists e turistas. Tenor indicaziuns dil ministeri da turissem palestinais hajan bunamain 3 milliuns turists visità las regiuns da la Palestina.
RR novitads 14:00