Siglir tar il cuntegn

Header

cuntegn

Criticher dal Kremlin en coma Nawalny na dastga betg sgular en Germania

Il criticher da la regenza russa, Alexej Nawalny, na dastga uss tuttina betg sgular en Germania. Tenor ils medis da l'ospital dad Omsk na saja el betg transportabel.

La pledadra da Nawalny di dentant che laschar el en l'ospital pericliteschia sia vita, perquai che l'equipament basegnaivel manchia.

La situaziun da l'um da 44 onns stoppia avant in transport emprim vegnir stabilisà, uschia il manader medical da l'ospital. I periclitass sia vita sch'el vegniss gia uss sgulà en l'exteriur. Plinavant sajan da sclerir dumondas giuridicas avant che dar el en tgira da medis europeics.

Medis n'han chattà nagins indizis d'ina intoxicaziun

Ni en il sang ni en l'urin hajan ins cumprovà tissi u fastizs d'in tal. Ins haja chattà ina diagnosa – la dunna da Nawalny e ses frar han survegnì quella.

Alexej Nawalny è stà sin viadi politic en Sibiria. Durant il sgol enavos da Tomsk a Moscau haja el sa sentì mal e pers la schientscha. Sinaquai ha l'aviun stuì atterrar urgentamain ad Omsk. Dapi lura è il politicher da l'opposiziun en il coma. Ses adherents partan l'opiniun ch'el saja vegnì tissientà.

audio
Per tadlar: Las novitads da las 12:00
ord Novitads dals 21.08.2020. Maletg: RTR
laschar ir. Durada: 4 minutas 55 Secundas.

RTR novitads 12:00

Artitgels legids il pli savens