Siglir tar il cuntegn

Exteriur Croazia serra cunfins - Serbia trametta enavos fugitivs

La Croazia ha serrà 7 da ses 8 passagis da cunfin cun la Serbia. Lezza vul entant trametter enavos en la Croazia plirs 100 fugitivs ch'èn entrads illegalmain en il pajais.

Polizia corata fraina ils migrants al cunfin.
Legenda: Millis da futigtivs vulan cuntascher ils stadis dal vest da l'UE sur la Croazia. Keystone

Questa mesira saja necessaria perquai che passa 11'000 fugitivs sajan vegnids dapi la mesemna en damaun en la Croazia, communitgescha il ministeri da l'intern croat. Il mardi aveva l'Ungaria serrà ses cunfins cun la Serbia. Dapi lura emprovan ils fugitivs da vegnir sur la Croazia. En vista a la situaziun da fugitivs reageschan blers pajais da l’Uniun europeica il mument cun controllas da cunfin pli severas.

Persunas che sa fultschan cun tutta forza sur las barricadas da la polizia.
Legenda: La polizia croata fraina ils fugitivs al cunfin. Keystone

Slovenia vul puspè trametter enavos fugitivs

Ordavant aveva la Slovenia interrut il traffic da tren cun la Croazia. La polizia ha communitgà ch'ins haja franà in tren cun radund 200 fugitivs al cunfin cun la Croazia. Entant vul il pajais puspè trametter enavos en la Croazia radund 250 figitvs ch'èn arrivads illegalmain en il pajais. La Croazia refusia però da pupè laschar entrar ils migrants, rapporta l'agentura da novitads slovena.

Ungaria cumenza cun la construcziun d'ulteriura saiv

L'Ungaria extenda sias mesiras d'immigraziun entant er als cunfins tar la Croazia, quai ha fatg a savair il minister da l'exteriur ungarais Peter Szijiarto. Tenor indicaziuns dal portal d'internet «Bama.hu» èn arrivads la gievgia 200 fugitivs sur la Croazia en l'Ungaria. Szijiarto ha attatgà il pajais vischin: «La Croazia n'è betg adattada per l'adesiun a la zona da Schengen.» Sco quai ch'il primminister Victor Orban ha fatg a savair, haja la construcziun d'ina saiv al cunfin cun la Corazia entant cumenzà.

Per l’autra mesemna è planisà in inscunter suprem dals schefs da stadi e regenza davart il tema.

RR novitads 06:00