En Croazia ha il socialdemocrat Zoran Milanovic gudagnà l'elecziun decisiva. El ha survegnì bunamain 53% da las vuschs e daventa nov president. La presidenta conservativa en uffizi, Kolinda Grabar-Kitarovic, ha cuntanschì sulet 47% da las vuschs e sto uschia far plaz a ses successur dals socialdemocrats. Quels resultats ha la cumissiun electorala annunzià suenter che bunamain tuttas vuschs èn dumbradas.
Jau na pretend nagina pussanza. Cun mai na vegni a dar naginas intrigas e cunvegnientschas en il zuppà.
En ses nov uffizi considereschia il nov president socialdemocrat Zoran Milanovic las partidas politicas sco egualas, «pertge nus avain ina democrazia parlamentara». Tut auter mainia arbitrariadad e tirannia, ha el declerà suenter sia victoria electorala a ses aderents.
Pli cler che spetgà
L'elecziun dal nov president è stada pli clera che spetgà oriundamain. En las ultimas retschertgas manava il victur cun in avantatg da sulet in punct procentual. La finala munta quel a sis puncts procentuals. Milanovic ha gia gudagnà l'emprima runda da l'elecziun dal president avant duas emnas. Ils gronds temas dal cumbat electoral èn stads gestiun guvernamentala nuneffizienta e massiva emigraziun.
Critichers din da Grabar-Kitarovic ch'ella fetschia empermischuns ch'ella na possia betg tegnair e fetschia da litgapes. A nivel internaziunal è Grabar Kitarovic dada en egl suenter il final dal campiunadi mundial da ballape l'onn 2018 a Moskau. Lura aveva la Frantscha gudagnà cunter la Croazia. Suenter il gieu aveva la presidenta l'emprim dà in bitsch a ses collega d'uffizi franzos Emmanuel Macron e lura a tut ils giugadurs sco er ils arbiters.
Indicatur per elecziuns parlamentaras
En Croazia ha il president cunzunt ina funcziun represchentativa. Las fatschentas da la regenza maina il primminister. Dentant vala l'elecziun sco indicatur per las elecziuns parlamentaras l'atun. Che la presidenta d'enfin uss ha pers uschè cler pudess far vegnir gnervus la partida conservativa HDZ.
RTR novitads 06:00