Naschida è l'idea da daventar croupier durant la pandemia. Là ha Cla cumenzà a dar poker cun ses amis, è silsuenter daventà dealer en in club da poker a Zezras ed uschia è sia passiun daventada realitad. Suenter ses emprendissadi sco automaticher era cler per Cla, ch'el na veglia betg cuntinuar sin questa clamada. Uschia ha el fatg il servetsch dal militar ed è silsuenter ì a Londra per far la scolaziun da croupier.
Focus sin roulette
Aifer be dus mais ha el emprais tut quai ch'ins sto savair. Per il gieu da poker ha quai dà in di scolaziun, per black jack trais dis e per Punto Banco (in gieu da carta cun finamira d'avair nov puncts, vegn era numnà Baccara) era trais dis. La paisa giaschava en la scolaziun pia cunzunt sin il gieu da Roulette, pertge quel è cumplitgà e passa fitg svelt. Apaina che la culla stat airi, sto el avair fatg tut ils quints en il tgau. E quai era sch'i sa mida e cun plirs giasts parallelamain.
Il chau sto propi lavurar.
Tut quai dovra concentraziun ch'i vala da tegnair durant l'entir di. Quai è be pussaivel, perquai ch'el sto far pausa suenter mintga gieu che cuzza tranter 30 e 45 minutas. Il di da lavur ha lura era enturn otg uras en differents servetschs. Quels cumenzan tranter las 15:30 e las 18:00 e cuzzan tut tenor fin las 01:00, las 02:00 u las 03:30 la notg.
In'autra particularitad da la clamada dal croupier è, ch'ils mauns ston adina esser cultivads – pertge ils mauns èn tia carta da visita. Uschia fa Cla Frölich mintga dus fin trais dis manicura ed ha er adina cun sai ina glima.
Ils clients
Tge clients ch'el haja pli savens – clients regulars ubain novs – po el respunder cun omauds. Tar ils novs po quai bain dar la situaziun, ch'el sto declerar il gieu perquai che la glieud n'enconuscha betg il gieu. Cuntrari saja quai lura tar ils experts. Persunas che vegnan forsa mintga trais dis, che sappian co il gieu funcziuna, possian lura era svelt enconuscher sias flaivlezzas sco croupier e duvrar quellas encunter el. P. ex. sch'el fiss plauns cun quintar, lura pudessan ils clients svelt midar la messa ed empruvar d'irritar il croupier. Ma questa cultura na saja betg fitg derasada en la Svizra ed il Principadi da Liechtenstein. Quai saja auter en l'exteriur, di il croupier da 22 onns.
Sch'ins lavura en in casino, lura na pon ins betg ir a dar en in auter casino. Almain en Svizra, Austria ed il Principadi da Liechtenstein èsi scumandà per mai da giugar.
Radund 400 clients visitan il casino d'in bun di, sco quai ch'il manager da communicaziun, Martin Frommelt, di envers RTR. Adina puspè datti era persunas che sa laschan serrar dals casinos, quai per sa schurmegiar da dependenza dal gieu. Actualmain sajan 3'000 persunas serradas en il Principadi dal Liechtenstein. Tranter quellas èn dasper ils dependents dal gieu era radund 500 persunas emploiadas dals set casinos en il «Ländle». Tar quellas tutga era Cla Frölich.
