Crudada d'Egypt Air: confusiun davart eventual'explosiun

Hai dà in’explosiun a bord dal sgol MS804? Funtaunas inuffizialas avevan rapportà che las fitg pitschnas parts d’umans chattadas fin uss sajan in indizi per quai. Il schef da la squadra d’investigaziun dementeschia uss dentant quai, scriva SRF Online.

Truppas da tschertga surveglian la zona da crudada ord in aviun. Bild in Lightbox öffnen.

Legenda da maletgs: Truppas da tschertga surveglian la zona da crudada. Entant han ins chattà passa 80 parts da baras. Keystone

Il schef da la squad’egipziana da forensichers ch’intercurescha la crudada dal sgol MS804 d’Egypt Air n’è betg d’accord cun la tesa d’in’eventual’explosiun a bord da l’Airbus 320.

A bun’ura aveva in forensicher declerà che tuttas 80 parts d’unfrendas chattadas fin uss sajan fitg pitschnas. «La decleraziun logica è ch’i ha dà in’explosiun». Tenor agentura sa tracta quai tar l’um, che na vul betg vegnì numnà, d’in commember uffizial da la squadra d’investigaziun.

Hesham Abdelhamid, il responsabel per la medischina giuridica, di uss dentant: «Tut quai ch’è vegnì publitgà surlonder è fauss e sa basa be sin presumziuns che n’èn betg da las autoritads forensicas.»

Tschertga per blackbox cuntinuescha

Fin uss n’han ins betg chattà il registratur da las datas da sgol ed il registratur da vuschs. Omadus ensemen furman l’uschenumnada blackbox e fissan impurtants per eruir il motiv da la crudada dal sgol.

Il militar egipzian tschertga vinavant parts dal vrac cun l’agid da la Frantscha. Questa tschertga è dentant difficila, cunquai che l’intschess ha ina surfatscha da sur 74 km2 – en tscherts lieus è la mars fin 3’000 meters bassa.

RR novitads 14:00