Tar in inscunter suprem en la Nigeria han ils partizipants fatg cler, ch'i saja da cumbatter communablamain cunter la millissa terroristica Boko Haram. Il president da la Frantscha, François Hollande, ha ditg che Boko Haram restia in grond privel, malgrà ils progress da l'ultim temp.
La Gronda Britannia ha empermess da sustegnair finanzialmain la Nigeria en il cumbat cunter la milissa. Ils proxims quatter onns vegn pajà radund 56 milliuns francs. - Boko Haram fa dapi il 2009 ina campagna sangiunusa en il nordost da l'Africa. En ils pajais Nigeria, Camerun, Niger e Tschad èn vegnidas mazzadas 14'000 persunas. Radund 2,7 milliuns carstgauns èn sin fugia.