Siglir tar il cuntegn
Inhalt

Exteriur Cumbat cunter fake news

Avant las elecziuns dal congress en ils Stadis Unids ha Twitter stizzà radund 10'000 accounts falsifitgads che derasavan a moda automatica faussas infurmaziuns.

In visur cun l'utschè da twitter.
Legenda: Avant las elecziuns dal congress en ils Stadis Unids ha Twitter stizzà 10'000 accounts falsifitgads. Keystone

Twitter ha stizzà passa 10'000 accounts ch'avevan appellà da boicottar las proximas elecziuns dal congress american. Tenor in pledader sajan ils contos vegnids stizzads tranter la fin da settember e l'entschatta d'october. Ils contos hajan fatg per sbagl la parita dad esser endrizzads dals Democrats.

Sco in pledader da Twitter ha confermà envers il portal d'internet TechChrunch, haja l'interpresa stizzà quels accounts, perquai che quels derasavan desinformaziuns a moda automatica. Quai che cuntrafetschia a las directivas da Twitter. Els hajan fermà quai svelt ed a la funtauna. Exempels concrets n'ha l'interpresa betg fatg ed er betg menziunà, tgi che stettia effectiv davostiers.

Twitter emprova dapi daditg dad intervegnir energicamain cunter profils falsifitgads che derasan spam e propaganda politica. Gia il fanadur aveva il schef da Twitter, Jack Dorsey, declarà ch'els hajan introducì novs meds per chattar cumportament problematic che sfalsifitgeschia l'opiniun publica.

RR novitads 07:00