Sin la terra franca dal Portugal furian il mument plirs diesch fieus. La protecziun civila discurra dad ina da las pli nauschas stads dals ultims onns. Pertutgà è surtut il nord dal pajais. Tenor rapports da medias èn passa 5’000 pumpiers en acziun.
Entant ha il pajais dumandà agid da l’Uniun europeica. Ils emprims 9 dis da l’avust sajan arsas passa 25’000 hectaras terra en il Portugal – dapli che durant l’entir 2014, rapporta la gasetta «Diario de Noticias» sa referind sin l’institut per il mantegniment da la natira e dal guaud.
Sch'ins va giuadora è la pel en curt cuverta cun tschendra.
Silvana Degonda, collavuratura da RTR sa chatta il mument datiers da Porto a Povoa de Varzim. Er sche quai lieu è in zic davent dals incendis gronds, sentian ins e savuria er quà ch'i arda. Il tschiel saja turbel e cuviera il sulegl, i savuria da fim e sch'ins giaja giuadora saja la pel e la vestgadira en curt cuverta cun tschendra.
150 chasas destruidas sin l'insla Madeira
Er sin l’insla da vacanzas portugaisa Madeira laschan ils incendis enavos fastizs da devastaziun. En la chapitala Funchal sajan fin ussa radund 150 chasas arsas, 3 persunas sajan mortas communitgescha la regenza. Passa 400 persunas han stuì vegnir evacuadas. Plir tschients pumpiers cumbattan ils fieus. Aviuns da stizzar na pon tenor ils experts betg vegnir en acziun. Ferms vents, setgira extrema e temperaturas da fin 37 grads ed il fim engrevgeschian las lavurs da stizzar. Davart la dimensiun dals donns na pon las autoritads anc far naginas indicaziuns.
Flommas pericliteschan er citads franzosas e spagnolas
En il sid da la Frantscha han ils incendis fatg gronds donns en la citad da Marseille. Las autoritads da la segund gronda citad franzosa communitgescha che bun 3300 hectaras sajan arsas e numerusas chasas donnegiadas u devastadas.
En la regiun spagnola Galizia han las autoritad dumbrà 7 incendis gronds fin la gievgia. Quels hajan fin ussa devastà radund 2’000 hectaras. Las flommas pericliteschan blers vitgs ed avischinan er al lieu da pelegrinadi Santiago de Compostela, rapporta l’emettur da televisiun RTVE.
RR actualitad 12:00