Suenter avair annunzià il matg che persunas vaccinadas na stoppian betg pli purtar mascrinas, revocheschan las autoritads americanas questa recumondaziun. L'autoritad da sanadad americana CDC (Centers for Disease Control and Prevention) argumentescha questa midada surtut cun la derasaziun da l'uschènumnada «varianta delta» e recumonda puspè mascrinas en il spazi public ed era en las scolas. Quai en las parts dal pajais, nua ch'il coronavirus sa derasa puspè fermamain – actualmain pia surtut en ils stadis federativs en il sid sco la Florida, il Missouri ed Arkansas.
Il president american Joe Biden ha appellà als stadis federativs da respectar las recumondaziuns dal CDC. Dapli persunas vaccinadas e purtar la mascrina en las regiuns da la «varianta delta» gidian ad evitar da stuair serrar scolas u butias u schizunt in lockdown.
En ils Stadis Unids po il CDC far las recumondaziuns. Ils stadis federativs èn però libers dad acceptar e realisar ellas u betg. Almain 8 stadis federativs scumondan actualmain schizunt da purtar mascrinas en scola.