Siglir tar il cuntegn

Header

cuntegn

Cumbats en il Sudan Dapi mesanotg vala ina pausa da cumbat da trais dis

Suenter discurs intensivs sajan l’armada e la milissa rivalisanta sa cunvegnidas ad ina pausa da cumbat da 72 uras, hai num ella decleraziun. Quella pausa da cumbat duai facilitar mesiras umanitaras. Fin uss para la pausa da cumbat a tegnair.

Cumbats en il Sudan

Avrir la box Serrar la box

Avant radund in'emna han cumenzà cumbats tranter ils dus general ils pli pussants dal pajais e lur unitads. Ils dus umens han manà il pajais en il nordost da l’Africa cun radund 46 milliuns abitantas ed abitants dapi dus cups militars communabels 2019 e 2021. De-facto-president Abdel Fattah al-Burhan, ch’è era schefcumandant da l’armada, cumbatta cun il militar ses substitut Mohammed Hamdan Daglo, il manader da la gruppa paramilitara pussanta Rapid Support Forces (RSF). Atgnamain avessan ils RSF stuì suttacumber a l’armada e surdar la pussanza en il pajais puspè ad ina regenza civila.

Tenor indicaziuns da l'organisaziun mundiala da sanadad WHO èn almain 413 persunas mortas dapi l'entschatta dals cumbats. Dapli che 3'500 persuans èn vegnidas blessadas. Il dumber effectiv da las unfrendas saja dentant probabel bler pli aut. Tenor l’ONU èn gia 20’000 Sudanaisas e Sudanais fugids en il pajais vischin, il Tschad.

Ils davos dis han las partidas da conflict gia fatg pliras annunzias sumegliantas ch'èn dentant betg vegnidas respectadas. Entant cuntinueschan las evacuaziuns or dal Sudan. Tenor Josep Borrell, l’incumbensà spezial per l’exteriur dall’UE han fin uss varga 1000 burgheis e burgheisas dal exteriur bandunau il pajais, tranter quels er 12 dalla Svizra.

Tenor indicaziuns da las Naziuns Unidas ein dapi l'escalaziun da la violenza avon radund ina emna passa 400 persunas vegnidas mazzadas ella tiara en il nordost dall'Africa.

Svizra ha serrà sia ambassada a Karthum

Il persunal da l'ambassada cun famiglias saja vegnì evacuà ed uss en segirtad. L’acziun saja stada pussaivla grazia a la collavuraziun cun auters stadis, surtut cun agid da la Frantscha. Tenor il Departament d’affars exteriurs giaja bain cun las 12 persunas evacuadas. I sa tractia da persunal diplomatic e confamigliars da quels.

Ulteriurs burgais svizzers han bandunà la chapitala sudanesa cun agid da l’Italia rapporta l'agentura da novitad Ansa. Il minister da l'exteriur a Roma aveva annunzià quai la fin d'emna. Totalmain veglia l'armada taliana evacuar 200 persunas or dal Sudan. La Svizra n'organisescha sezza naginas evacuaziuns. Tenor l'EDA sajan radund 100 Svizras e Svizzers en il Sudan.

Enfin uss sajan radund 30 ulteriurs burgais e burgaisas svizras s'annunziadas per bandunar il Sudan. Quellas pon probablamain sgular cun in'aviun da l'armada tudestga.

video
Persunal da l'ambassada è vegnì evacuà
Or da Tagesschau dals 23.04.2023.
laschar ir. Durada: 11 minutas 35 Secundas.

Salvà civilistas or dal Sudan

Avant avevan il minister da l'exteriur talian Antonio Tajani, sco er il minister da la defensiun Guido Crosetto annunzià d'evacuar pliras persunas svizras or dal pajais da guerra Sudan. Cun sustegn dal militar talian vegnan radund 200 civilistas e civilists evacuads, tranter quels era Svizzers e Svizras. Tajani n'ha betg pudì dir quantas da las var 200 persunas ch'èn svizras. Tenor il departament da l’exteriur svizzer èn actualmain var 100 Svizras e Svizzers en il Sudan.

Dus aviuns da transport dal tip C-130 èn partids la dumengia suentermezdi davent dal pajais ost-african Dschibuti en direcziun da la chapitala sudanaisa Khartum.

C-130-Militärflugzeug
Legenda: Aviun da transport dal tip C-130 (Maletg da l'aviun è dals 27 da favrer 2022 sin la basa da l'aviatica militara Elefsina en Grezia) REUTERS/COSTAS BALTAS

Las autoritads svizras n’han per entant betg prendì posiziun davart l’evacuaziun da la dumengia. Envers SRF ha il Departament federal d’affars exteriurs (EDA) dentant confermà la sonda ch’i vegnian examinads cuntinuadamain scenaris e mesiras.

Tudestgas e tudestgs vegnan er evacuads

L'armada da la Republica Federala Tudestga ha la dumengia cumenzà dad evacuar las burgaisas ed ils burgais tudestgs or dal Sudan. Tenor infurmaziuns da l'agentura da novitads tudestga saja l'aviatica militara tudestga sgulada en il pajais cun transporters da militar. La Germania sco er auters pajais or dal vest hajan gia dapi plirs dis preparà in'acziun da salvament protegida dal militar. Tenor stan actual vulan ins salvar radund 150 Tudestgas e Tudestgs.

Papa Franzestg ha appellà da terminar ils cumbats

A Roma ha papa Francestg appellà a las partidas da conflict en il Sudan da terminar ils cumbats e dad ir la via dal dialog. Las armas stoppian taschair per immediat, ha ditg il papa davant 30’000 cartentas e cartents sin la plazza da son Peder a Roma.

RTR novitads 17:00

Artitgels legids il pli savens