Avant che la pausa da cumbat duai cumenzar en la regiun da Karabach en il Caucasus, hai para dà pliras attatgas. Quai rapporta l'agentura da novitads AFP. Ordavant èn las partidas da conflict – l’Armenia e l’Aserbaidschan – sa cunvegnidas ad ina pausa da cumbat. Questa pausa duaja valair a partir dad immediat, ha communitgà il ministeri da l’exteriur russ che ha intermedià en chaussa.
La pausa da cumbat duaja tranter auter vegnir duvrada per barattar praschuniers da guerra ed ulteriuras persunas arrestadas. Discurs da pasch fundamentals duaja lura dar sut il timun da l’Organisaziun per la segirezza e la collavuraziun en l’Europa OSZE.
Pli ferma escalaziun dapi il 1994
Dapi ch'il cumbats han cumenzà la fin setttember èn mortas pliras tschient persunas sin omaduas varts. Be da la vart da l'Armenia èn morts passa 400 schuldads. Ils cumbats èn la pli ferma escalaziun dal conflict che dura gia dapi decennis. Il 1994 eran las partidas atgnamain gia sa cunvegnidas ad ina pausa da cumbat.
La regiun da Karabach nua che la gronda part da la populaziun è Armens aveva proclamà l'independenza da l'Aserbaidschan en ina guerra il cumenzament dals onns 1990. La regenza da l'Aserbaidschan renfatscha al vischin Armenia d'avair occupà illegalmain territori da l'Aserbaidschan.