Siglir tar il cuntegn
Inhalt

Exteriur Cumond d'arrest uffizial encunter Carles Puigdemont

La giustia spagnola ha relaschà in cumond d'arrest europeic encunter l'anteriur primminister catalan.

Politicher catalan.
Legenda: La giustia spagnola prenda ulteriuras mesiras cunter Carles Puigdemont e ses cabinet catalan. Keystone
  • La curt constituziunala spagnola ha relaschà in cumond d'arrest europeic cunter il primminister relaschà da la Catalugna, Carles Puigdemont.
  • Quai ha la dretgira dà enconuschent a Madrid
  • Puigdemont n'era betg cumparì avant dretgira, malgrà ch'el era vegnì cità. Il cumond d'arrest vala er per quatter ulteriurs ministers relaschads, ch'èn medemamain fugids en Belgia.

Otg anteriurs ministers da la Catalugna ston ir en arrest d'inquisiziun. In novavel na sto betg ir en praschun sch'el paja ina cauziun da 50'000 euros. Quai ha decis ina dretgira a Madrid, rapportan medias spagnolas.

Cumond d'arrest cunter Puigdemont

Auter che l'anteriur primminister catalan Carles Puigdemont èn quels nov ministers cumparids l'avantmezdi avant la dretgira. Per Puigdemont e quatter ulteriurs ministers ha la curt constituziunala decretà in cumond d'arrest europeic. Lezs sa chattan il mument en la Belgia.

RR novitads 18:00+

Cumond d'arrest europeic

Suenter ch'in cumond d'arrest europeic è decretà, sto il pajas, en il qual la persuna è vegnida arrestada, extradir ella entaifer 60 dis. Dat la persuna ses consentiment a l'extradiziun, sto entaifer 10 dis vegnir decis davart la surdada.