La Germania prolunghescha las controllas dals cunfins en connex cun la pandemia. Fin ils 15 da matg cuntinueschan ils Tudestgs las controllas als cunfins cun la Svizra, l'Austria, la Frantscha, il Luxemburg ed il Danemarc per limitar il privel d'infecziun cun il coronavirus, scriva il ministeri da l'intern tudestg.
Sur il cunfin tudestg mo cun «raschuns stringentas»
Uschia dovri vinavant ina raschun impurtanta per dastgar entrar en la Germania. Dapi mez mars valan per persunas che n'èn betg oriundas da la Germania reglas rigurusas. Per exempel èsi lubì d'entrar a burgais da l'Uniun europeica mo, sch'i èn sin via tras la Germania en lur patria, ubain sch'i transportan rauba impurtanta.
Avertura dals cunfins en planisaziun
En vista èn eventualas averturas da parts dal cunfin a partir da mez matg. Sco quai che l'agentura da novitads tudestga DPA rapporta, sajan il minister da l'intern tudestg Horst Seehofer ed il primminister da Schleswig-Holstein Daniel Günther sa cunvegnids da sviluppar in urari en etappas, per avrir ina giada il cunfin cun il Danemarc.
