Per mintga fugitiv cun bunas schanzas da recepziun datti in curs d'integraziun da 600 uras. Cun il curs possian ils fugitivs cumenzar gia durant la procedura d'asil.
Emprender la lingua, l'istorgia e la cultura tudestga
I saja impurtant che fugitivs emprendian tudestg, per ch'els chattian ina lavur, uschia Merkel. Ils uffants da fugitivs vegnian integrads fitg spert en scolina u scola. En ils curs d’integraziun emprendian ils immigrants betg mo lur tudestg. Els emprendian er l’istorgia, la cultura ed il reglament giuridic da la Germania.
Fugitivs che na vegnan betg persequitads u che n'èn betg periclitads da la guerra duain perencunter vegnir tramess uschè svelt sco pussaivel enavos en lur pajais, ha Merkel ditg vinavant.
Pajais en l'ost serran eventualmain lur cunfins
La Bulgaria, la Serbia e la Rumenia han annunzià da vulair serrar lur cunfins per fugitivs; dentant mo en il cas che la Germania e l'Austria veglian prender ina tala mesira. Ins na saja betg pront da laschar sa sviluppar ils 3 pajais dal Balcan sco zona neutrala per migrants. Quai ha ditg il primminister da la Bulgaria Borisow suenter in inscunter cun ses collegas d'uffizi da la Serbia e la Rumenia.
RR novitads 15:00 / 16:00