L’attatga da hackers n’haja fatg nagins donns. Il cas mussia però a tge privel che furniturs d’electricitad sajan exposts. Tenor la gasetta sa tractia da hackers russ. En il sistem dal concern saja vegnì chattà in code che mussia vi sin ina cyberattatga russa cun num «Grizzly Steppe». Il motiv per l'attatga na saja anc betg cler. Probablamain hajan ils hackers vulì guardar sch'els vegnissan da penetrar parts da la rait dals Stadis Unids.
80'000 persunas senza electricitad
Il december 2015 aveva ina attatga da hackers procurà per in'interrupziun d'electricitad en il vest da l'Ucraina. L'interrupziun aveva cuzzà pliras uras ed 80'000 persunas èn stadas pertutgadas. La Russia aveva snegà d'esser responsabla per l'attatga.
Ils servetschs secrets dals Stadis Unids renfatschan a la Russia d'avair manipulà las elecziuns per il presidi american cun agid d'attatgas da cyber. Els duain avair fatg public ils e-mails da Hillary Clinton. L'USA reproscha uss a la Russia d'avair cuntinuà cun las attatgas da cyber.
RR novitads 09:00