En l'Australia èn tant la regenza sco era numerusas firmas ed organisaziuns stadas l'unfrenda d'ina cyberattatga massiva. Quai ha ditg il primminister, Scott Morrison, il venderdi tar ina conferenza da medias a Canberra. Davos las attatgas tecnicamain raffinadas stettia senza dubi in auter stadi, ha declerà Morrison senza menziunar nums.
Sper tut ils stgalims da regenza hajan ils hackers er attatgà ils sistems da computer d'organisaziuns politicas, da la sanadad e d'educaziun sco er ils gestiunaris d'infrastructura impurtanta.
La cyberattatga saja dentant en ina gronda part dals cas stada senza success. Fin uss na dettia nagins indizis ch'i saja vegnì engulà datas persunalas en gronda dimensiun.