Siglir tar il cuntegn
cuntegn

Exteriur Damain dischoccupads en Germania

En Germania è il dumber da dischoccupads tschessà per sur 80’000 sin uss radund 2,8 milliuns persunas. En cumparegliaziun cun l’onn avant è il dumber sa sminuì per 120’000 persunas, scriva l’agentura da lavur tudestga.

Ina filiala da l’agentura da lavur da la Germania.
Legenda: L'avrigl 2015 avevan 208'000 persunas dapli ina plazza da lavur ch'il medem mais avant in onn. Keystone

La quota da dischoccupaziun en Germania è uss da nov sin 6,3%. En media dals davos 3 onns era la dischoccupaziun ida enavos sumegliantamain.

Cun la stad vegn la lavur

Il motiv principal per il sbassament da la dischoccupaziun è la stagiun. Cun la fin da l’enviern engaschan fatschentas da construcziun, da l’agricultura e da la gastronomia dapli collavuraturs. Tenor il schef da l’agentura da lavur da la Germania Frank-Jürgen Weise sa sviluppeschia il martgà da lavur vinavant favuraivlamain. Quai malgrà che la creschientscha economica en Germania saja sa sminuida il davos temp.

Dumonda da forzas da lavur crescha

Il matg 2015 eran annunziadas 557'000 plazzas libras tar las agenturas da lavur. Quai èn 75'000 dapli che l'onn avant. Surtut plazzas en l'industria da metal, la mechatronica, la logistica e la tecnica da maschinas e da vehichels èn tschertgadas.

Per ils proxims mais quintan experts dal martgà da lavur ed economs vinavant cun ina dischoccupaziun sbassanta, dentant pli plaun che fin quà.

RR novitads 15:00