Siglir tar il cuntegn
cuntegn

Exteriur Damain dischoccupads en la zona da l'euro

La dischoccupaziun en ils stadis da la zona da l’euro è restada il matg sin 11,1%. Quai è la pli bassa quota da dischoccupaziun dapi trais onns scriva l’uffizi da statistica europeic eurostat.

um stat avant ina paraid e legia ils inserats da plazzas da lavur
Legenda: En Spagna ed en Grezia è la situaziun da lavur precara. Keystone

En ils 19 pajas dal euro avevan il matg 17,7 milliuns persunas nagina lavur, quai èn 35’000 persunas pli pauc che l’avrigl. La pli bassa quota ha la Germania cun 4,7 %. Circa 2,7 milliuns Tudestgs èn dischoccupads. Quai è il pli bass stan dapi l'onn 1991 scrivan ils responsabels da la Germania. Spezialmain nauscha è la situaziun en il martgà da lavur en ils pajais Grezia (25,6 % èn senza lavur) e Spagna (22,5 % senza lavur).

Giuventetgna pertutgada ferm

Pervi da differentas metodas da calcular pon las cifras da eurostat variar cun las cifras naziunalas. Spezialmain pertutgà da la dischoccupziun èn ils giuvens tranter 15 e 24 onns. En il spazi da l'euro èn 22,1% dals giuvens senza lavur, quai è in dumber da 3,1 milliuns. En tut ils pajais da l'Uniun europeica (pia era quests pajais che n'han betg l'euro) eran ils matg 23,35 milliuns persunas senza lavur. Quai è ina quota da 9,6% ed è la pli bassa quota dapi 4 onns.

RR novitads 12:00