Siglir tar il cuntegn

Header

Navigaziun

Il tren da persunas disgrazià sin la punt dal Grond Belt tar Nyborg en Danemarc.
Legenda: Il tren da persunas disgrazià sin la punt dal Grond Belt tar Nyborg en Danemarc. Keystone
cuntegn

Exteriur Danemarc: 8 persunas moran tar disgrazia da tren

La disgrazia da tren sin ina gronda punt en il Danemarc ha custà la vita ad otg persunas – tschintg dunnas e trais umens. 16 persunas sajan vegnidas feridas. Quai ha confermà la polizia locala danaisa.

La polizia locala ha infurmà dad otg persunas mortas e 16 feridas. Pertge ch'i ha dà la disgrazia sin la gronda punt danaisa vegn investigà. Actualmain datti adina dapli infurmaziuns da la disgrazia.

Las agenturas da novitads rapportan, ch'il tren cun 131 passagiers a bord saja vegnì tutgà durant ses viadi la bun'ura las 07:30 dad in object ed haja stuì franar abruptamain. Tenor rapports da medias hajan vents burascus stratg liber parts dad in vagun da vitgira e buffà quellas cunter il tren.

Tren da vitgira cun vart stgarpada si.
Legenda: Tenor medias danaisas saja quest tren da vitgira stà cumpiglià en l’accident. Keystone

La disgrazia è succedida sin la punt gronda che maina sur la stretga da la mar «Grond Belt». La punt da 18 kilometers collia il Danemarc da l'ost cun la part en il vest. Tant questa punt sco er la punt gronda tranter il Danemarc e la Svezia eran serradas pervi da vents burascus per il traffic dad autos.

Pervi dals stemprads hajan bleras regiuns scandinavas gì problems cun la forza electrica. Er il traffic sin il pajais e sin la mar haja gì da patir scriva la SDA.

RR novitads 11:00++