Cun in’autra lescha per ina lescha d’asil pli restrictiva vul il pajais numnadamain declerà tut ils fugitivs che surpassan ils cunfins sco delinquents. La lescha ha quasi la finamira d’abolir l’asil.
Strivla da transit per impedir dumondas d'asil
Tenor rapports da medias èsi planisà ina strivla da transit da 60 meters per la quala i vala las medemas pretensiuns sco per ina zona da transit a l’eroport. Vul dir, tgi che cuntanscha quest territori n’è anc betg en l’Ungaria e po uschia vegnir impedì da far ina dumonda d’asil en il pajais.
Nagins trens en direcziun Germania
Il Danemarc ha interrut il traffic da tren cun la Germania ad interim. La raschun sajan ils tschients da fugitivs che dastgian viagiar da la Germania sur il Danemarc en Svezia. Tenor rapports da medias ha la polizia danaisa er serrà l’autostrada en direcziun Germania. Fugitivs che n’hajan betg vulì viagiar vinavant cun il tren hajan empruvà dad ir vinavant a pe.
Blers migrants vulan cuntanscher la Svezia perquai ch’il pajais scandinav ha ina politica d’asil pli liberala. Il Danemarc perencunter suonda in curs restrictiv.
RR novitads 06:00