Danovamain pausa da cumbat ad Aleppo

Il president russ, Wladimir Putin ha ordinà per venderdi ina pausa da cumbat da 10 uras per la citad siriana d'Aleppo.

Purtret da ruinas ad Aleppo. Bild in Lightbox öffnen.

Legenda da maletgs: Per il mument cuntinueschan ils cumbats per la citad Aleppo di per di. Reuters

Tenor il schef dal stab general russ vala quella da las 9 la damaun fin la saira da las 7. Il mardi aveva la Russia anc fatg dependent ina tala pausa da cumbat da quai ch'ils rebells fineschian lur attatgas.

Per pudair vegnir cun civilists e blessads or da la citad hajan ins avert 6 corridors. Tenor experientschas che l'ONU ed ovras d'agid han fatg enfin uss n'han las uschenumnadas pausas umanitaras ad Aleppo maina purschì segirtad avunda per pudair gidar la populaziun civila.

Anc adina 275'000 civilists ad Aleppo

L'anteriura metropola d'economia è partida tranter ils rebels ed ils schuldads da la regenza dapi la stad 2012. Mez fanadur avevan las truppas da la regenza lura serrà en ils quartiers dals rebels cumplettamain. Là èn tenor l'ONU anc circa 275'000 civilists serrads en.

En il vest d'Aleppo han rebels empruvà da rumper tras las barrieras dals schuldads il venderdi. Lur finamira era da far via per pudair sustegnair ils rebels ch'en il mument en l'ost da la citad.

RR novitads 10:00