Ils activists han appellà via medias socialas da bloccar las vias a Paris. La polizia tema acts da violenza sco gia avant in'emna ed ha perquai mobilisà radund 5'000 policists. En spezial duain ils access al boulevard Champs Elysées en la chapitala franzosa vegnir controllads rigurus.
Ils Gilets jaunes pretendan tranter auter sbassaments da taglia sco er in auzament da las pajas minimalas e da las rentas. Macron ha entant consentì d'adattar la taxa ecologica dispitaivla sin diesel al pretsch da carburant. Per ils activists è quai dentant anc memia pauc.
Dapi l'entschatta da las protestas èn duas persunas vegnidas mazzadas tar bloccadas da vias ed enturn 600 èn vegnidas blessadas.
RR novitads 11:00
