Exteriur - Dapli polizia en vischinanza da las fieras da Nadal
Suenter l'attatga da Berlin rinforza la polizia tudestga en blers lieus las mesiras da segirtad sin las fieras da Nadal. A Berlin patruglieschan dapli policists, en pli duain mesiras tecnicas impedir in access nuncontrollà. Restricziuns han era auters corps da polizia en la Germania annunzià.
Er en Svizra han las polizias da Turitg e Basilea adattà lur concepts da segirtad per las fieras da Nadal. Autras polizias da citads u da chantuns han communitgà da gia avair augmentà las mesiras sin fundament d'incaps en il passà.
Il privel n'è betg pli aut
Dentant era suenter l'attatga a Berlin na discurra la polizia federala tudestga betg d'in privel da terror pli aut. Gia fin uss haja valì per la Germania ina situaziun da privel pli seriusa. Questa valitaziun saja sa mussada sco correcta.
