Tut en tut èn mortas l'onn passà 26'000 persunas sin vias da pajais da l'UE entras accidents da traffic. Quai èn 300 dapli che l'onn 2014. Quai scriva il portal da novitads «Welt Online» cun sa referir sin il nov rapport annual da la cumissiun da l'UE davart la segirezza dal traffic sin via. Passa trais quarts da las unfrendas sajan stads umens. Ils pli blers morts da traffic haja dà en la Bulgaria ed en la Rumenia – ils pli paucs a Malta ed en Svezia.
Numerus grevamain blessads
Dasper las bleras baras haja er dà numerus grevamain blessads entras accidents. L'onn passà saja quai stà radund 135'000 - ils blers eran peduns, velocipedists ubain glieud pli passada. La finamira da l'Uniun europeica era atgnamain da reducir il dumber d'unfrendas dal 2010 enfin il 2020 per la mesadad. Dapi lura è il dumber bain sa reducì per 17%, ma quai n'è betg avunda.
RR novitads 10:00