Siglir tar il cuntegn

Header

cuntegn

Debatta generala ONU L'ONU flaivla ed il mund «or da controlla»

Al cumenzament da la debatta generala da l'ONU han tranter auter Alain Berset, Wolodimir Selenski ed il secretari general Antonio Guterrez. Quel tschantscha d'in cumbat per il surviver.

Il rapport d'Antonio Guterrez, secretari general da l'ONU, è per part dramatics. Las regenzas dals 193 pajais ch'èn commembers da l'ONU na sajan betg en il stan da schliar problems, e quai pertutgia er l'organisaziun globala. Tar ses pled ha el dentant ditg che l'ONU saja stgaffida per crisas. Sch'ella saja pronta per quella situaziun saja dentant «cumplainamain avert».

Alain Berset tschantscha da gronda inegualitad

La crisa dal clima, guerras, conflicts socials e catastrofas da la natira augmentan las inegualitads socialas ed economicas. Per cumbatter quellas dovra il mund tenor l'avis dal president da la confederaziun Alain Berset ina ferma Organisaziun da las Naziuns Unidas. Ils ultims 20 onns saja la differenza d'entradas tranter ils pli ritgs 10% ed ils pli povers 50% da la populaziun mundiala sa dublegiada. Oz sajan las inegualitads uschè grondas sco a l'entschatta dal 20avel tschientaner, avant l'emprima guerra mundiala.

video
Berset: «Uss dovr'jau ina pausa»
Or da News-Clip dals 19.09.2023.
laschar ir. Durada: 4 minutas 54 Secundas.

Selenski pretenda sustegn internaziunal

La guerra russa cunter l'Ucraina na pericliteschia betg mo l'Ucraina sezza, mabain er blers auters stadis. Quai ha il president ucranais Wolodimir Selenski ditg a la radunanza plenara da l'ONU a New York. Moscau nizzegia ils pretschs da mangiativas sco arma. Ils effects sajan da sentir da la Costa da l'Atlantic da l'Africa enfin il Sidost da l'Asia. Selenski ha appellà a la cuminanza internaziunala d'agir communablamain. L'armaziun stoppia vegnir restrenschida, crims da guerra chastiads e persunas rapinadas turnadas a chasa. Per cuntanscher quai stoppian ils stadis esser unids.

Stadi da l'ONU è schlet

L'ONU funcziunia mo bain sch'ils pajais pussants collavureschan, di expert Richard Gowan da l'International Crisis Group. Da quai sajan els dentant en il mument lunsch allontanads. Cun vetos blocheschan els in l'auter en il cussegl da segirezza da l'ONU. Entant n'hajan quellas partiziuns da l'ONU che funcziunan, per exempel per agid umanitar, nagins daners.

RTR novitads 07:00

Artitgels legids il pli savens

Scrollar a sanestra Scrollar a dretga