Siglir tar il cuntegn

Header

Apple a New York.
Legenda: In bun di per Apple – sch'i va tenor la dretgira da l'UE sa il concern american spargnar 13 milliardas euro. Keystone
cuntegn

Decisiun annullada Spargnà 13 milliardas euros – Apple na sto betg pajar impostas

Il tribunal d l'Uniun europeica UE ha fatg in'emprima fin a la dispita tranter il concern da tecnologia Apple e la cumissiun da l'UE. Quai scriva l'agentura da novitads svizra SDA.

La dispita dura dapi quatter onns ed ella era intensiva. La dumonda en il center: Ha l'Irlanda concedì al concern da tecnologia Apple cundiziuns fiscalas memia bunas u betg?

Gea, ha ditg la cumissiun da l'UE ed ha perquai pretendì impostas supplementaras dad Apple e quai en in'autezza impressiunanta schizunt per Apple. La cumissiun vuleva numnadamain 13 milliardas euros.

Raschun per Apple e l'Irlanda

Na, han ditg Apple e ses pajais ospitant, l'Irlanda, e perquai èn els ids avant dretgira. Na di uss er la dretgira da l'UE a Luxembourg. Ils derschaders argumenteschan: La cumissiun da l'UE n'haja en quest cumbat giuridic betg savì mussar si che las cunvegnas fiscalas dals onns 1991 e 2007 tranter l'Irlanda ed Apple sajan in agid statal betg giustifitgà.

Implicaziuns politicas cumplitgadas

Tar las dispita na vai dentant betg be per blers raps. Sco cun l'Irlanda sa dispita la cumissiun da l'UE er anc cun auters stadis commembers pervi da cundiziuns fiscalas che quels dattan a firmas. La sconfitta cunter Apple vegn ad engrevgiar quellas tractativas.

Percunter vegn la decisiun a mitigiar in zic las undas tranter l'UE ed ils Stadis Unids – ed er l'image dad Apple vegn puspè meglier.

A fin il chapitel dentant betg l'istorgia

Tenor experts saja dentant pli probabel che la decisiun dal tribunal da l'UE na saja betg la fin da l'istorgia mabain plitost la fin dad in chapitel. I vegn spetgà che la dispita cuntinua avant il tribunal da l'Uniun europeica.

La cumissiun ha uss dus mais temp per appellar a questa proxima instanza.

RTR novitads 14:00

Artitgels legids il pli savens

Scrollar a sanestra Scrollar a dretga