Siglir tar il cuntegn
cuntegn

Exteriur Demissiunar n'è betg in tema per Mugabe

Il president dal Simbabwe, Robert Mugabe, ha admess en in pled a la naziun ch’i dettia problems en il pajais, ma betg annunzià sia demissiun. Quai rapportan differentas agenturas da novitads.

Um che sesa vi dad ina maisa cun in microfon davant el.
Legenda: Il president dal Simbabwe durant ses pled a la naziun. Keystone

El enclegia – che la situaziun economica difficila ed ils cumbats entaifer la partida da regenza Zanu-PF hajan frustrà blers, ha el ditg en la televisiun statala. La regenza vegnia a preschentar refurmas. Plinavant ha el annunzià - ch’el vegnia a manar il congress da la partida Zanu-PF il december che vegn.

Ultimatum a Mugabe: ir sez u vegnir mess giu

Ad ina sesida extraordinaria ha la partida da regenza Zanu-PF mess giu Robert Mugabe sco president da la partida, exclus el da la partida e dà ad el in ultimatum: Ella pretenda, che Mugabe sa retiria fin damaun a mezdi sco president dal pajais. Uschiglio instradeschia ella ina procedura da relaschada d’uffizi, uschia la Zanu-PF.

Sche Mugabe refusa puspè da sa retrair vegn probablamain il parlament a metter giu el il mardi proxim. Or da la partida da Mugabe ha fatg valair il schef da la gruppa da veterans, Chris Mutsvangwa, perfin, che Mugabe duaja laschar il pajas fin tant ch'el saja anc abel da far quai.

Er ils manaders dals putschists veglian puspè tractar cun Mugabe, per persvader el da sa retrair sez da l'uffizi sco president da Simbabwe.

Emmerson Mnangagwa, il medem successur per tuts dus uffizis

Emmerson Mnangagwa (75) succeda a Mugabe sco president da la partida da regenza. Mnangagwa era fin dacurt vicepresident, era però vegnì relaschà da Mugabe per che Grace, la dunna da Mugabe, possia daventar presidenta da Simbabwe.

Tenor ils observaturs haja questa relaschada gì per consequenza, ch'il militar è vegnì activ en il cumbat da pussanza che Mugabe para uss da perder. Sia dunna Grace è vegnida bittada or da la partida e duai vegnir messa avant tribunal.

Prognosas per in midament betg propi optimisticas

Mugabe stà al mument sut arrest da chasa en sia villa. El aveva manà il pajais dapi l'independenza da l'Engalterra l'onn 1980. Cun il pajais va quai però economicamain dapi onns be anc vers engiu e politicamain en l'isolaziun internaziunala.

Cun quai che ses successur probabel, Mnangagwa, fa dapi onns part da la nomenclatura en il pajais e cun quai ch'el è enconuschent sco hardliner (surnom: il crocodil) vegn supponì che la politica na vegnia betg a sa midar tant.

RR novitads 14:00++