Siglir tar il cuntegn

Header

cuntegn

Exteriur Democrat gudogna ad Alabama – schleppa per Trump

Il democrat Doug Jones gudogna surprendentamain l'elecziun en il senat en il stadi federativ Alabama. La terrada dal republican, Roy Moore è ina schleppa per il pesident american Donald Trump. Quel ha gratulà al victur. Moore n'haja betg vulì acceptar la terrada.

Surprendenta è la situaziun perquai ch'Alabama è uschiglio in stadi federativ dals Stadis Unids conservativ, pia republican. Che gist quai stadi federativ elegia ussa in democrat en il senat è surprendent. Cun Doug Jones en il senat sa sminuescha il spazi d'agir per Donald Trump en il congress. La pluralitad dals republicans en il senat giascha ussa tar 51 da total 100 sezs. Ad Alabama è dapi il 1992 betg pli vegnì elegì in democrat en il senat.

Suenter la dumbraziun da bunamain tuttas vuschs è Jones stà davant cun 49,9% da las vuschs. Moore ha survegnì 48,4% da las vuschs cun ina distanza da radund 20'000 vuschs. Las medias americanas han lura proclamà Jones sco victur.

Dignitad e respect

Jones ha ditg ch'i saja ì ad el durant il cumbat electoral sur tut per dignitad e respect.

Alabama è stà vid ina cruschada. Questa saira avais vus tschernì la dretga via.
Autur: Doug Jones Senatur democratic per Alabama

Er autras vuschs da la partida han festivà la victoria en il stadi fitg conservativ. Il pajais na vegnia betg ad emblidar che Alabama haja vuschà per la speranza e Trump saja sa mess sin la vart dad in violader d'uffants supponì, uschia il senatur Chris van Hollen. Il schef da partida dals democrats, Tom Perez ha ditg ch'ins na possia betg esser la partida da las valurs famigliaras ed il medem mument sustegnair «umens tarladids» sco Moore.

Scandal enturn il republican Roy Moore

Moore, che ha 70 onns è vegnì inculpà da pliras dunnas ch'el duai avair persequità u mulestà ellas sexualmain avant radund 40 onns, cura ch'ellas sajan anc stadas adolescentas. Moore è stà da quai temp procuratur public. Tranter auter duai el avair mulestà ina giuvna da 14 onns. Moore ha dentant negà tuttas accusaziuns.

RR novitads 06:00

Artitgels legids il pli savens