Siglir tar il cuntegn

Header

Navigaziun

Purtret dad Elizabeth Warren.
Legenda: Elizabeth Warren vul che Trump vegnia relaschà da ses uffizi. Reuters
cuntegn

Exteriur Democrata pretenda da relaschar Trump da ses uffizi

Suenter la publicaziun dal rapport da Mueller en ils Stadis Unids, duai dar ina procedura da relaschar il president Donald Trump ord l'uffizi. Quai pretenda la candidata dals democrats per l'elecziun dal president Elizabeth Warren. Trump haja impedì las inquisiziuns davart sia atgna elecziun.

Il cumportament sbaglià da Donald Trump saja uschè gravant che la chombra dals represchentants stoppia instradar ina procedura per ina relaschada d'uffizi, scriva Elizabetg Warren sin Twitter. La senatura è cun quai l'emprima concurrenta principala da Trump per las proximas elecziuns che pretenda quai.

Auters democrats èn s'exprimids encunter ina tala procedura. 18 mais avant las elecziuns na fetschia quai nagin senn pli. Il pievel american duai decider.

Mussaments per atgisar Trump mancan

Il rapport final da l'investigader spezial, Robert Mueller davart l'affera cun la Russia è vegnì publitgà gievgia dal ministeri da giustia, quai cun passaschas coluradas nair. Mueller n'ha chattà suenter prest dus onns nagins mussaments ch'i haja dà ina cunvegna tranter il team d'elecziun da Trump e la Russia.

Er per pudair atgisar Trump perquai ch'el haja empruvar d'impedir la giustia n'ha Mueller betg chatta avunda mussaments. Dentant sajan «pliras acziuns dal president stadas adattadas per influenzar a moda nunlubida las investigaziuns da las autoritads». Warren ha declerà ch'i pudess donnegiar a moda durabla ils Stadis Undis sche las emprovas da Trump dad empruvar d'impedir investigaziuns da ses agen sa cuntegnair vegnian ignoradas.

RR novitads 10:00