Schuldads han sajettà rachetas per la defensiun da l’aria, granatas ed ulteriurs projectils sin miras da test. Quest manever mussia al mund che l’armada sustegnia el e ch’ella saja pronta da defender il pajais – ha ditg Maduro. Entant han er l’Israel e l’Australia renconuschì il manader da l’opposiziun Juan Guaidó sco president transitoric. Els suondan uschia als Stadis Unids, il Canada e plirs pajais sidamericans che sustegnan gia Guaidó. La Russia e la China percunter sustegnan però vinavant Nicolas Maduro.
Futur intschert
Plirs stadis da l’Uniun europeica, tranter auter la Germania, han dà a Maduro in ultimatum da 8 dis per fixar novas elecziuns. Uschiglio vegnian er els a renconuscher Juan Guaidó sco president transitoric.
Lez ha clamà a novs protests cunter Maduro. Mesemna e sonda duajan els puspè ir sin via e demonstrar. Decisiv per il futur vegnia tenor experts ad esser la posiziun dal militar en il pajais sidamerican. Enfin qua sustegn il militar anc Maduro.
RR Novitads 06:00
